|
 |
|
معاشرے کی پیشرفت کا انحصار ، قرآن سے انس و لگاؤ پر ہے ۔قائد انقلاب اسلامی
قائد انقلاب اسلامی حضرت آیت اللہ العظمیٰ خامنہ ای نے اسلامی معاشرے کی پیشرفت کو قرآن سے انس حاصل کرنے پر منحصر قراردیا ہے ۔
قائد انقلاب اسلامی نے تہران میں منعقد ہونے والے حفظ و قرائت قرآن کے عالمی مقابلوں میں شرکت کرنے والے قاریوں سے خطاب میں فرمایا کہ اسلامی معاشرے کے لئے اور اس کے اعلیٰ مقاصد کے حصول کے لئے قرآن سے انس حاصل کرنا اور قرآن کے وعدوں پر یقین کرنا لازمی ہے ۔آپ نے فرمایا کہ قرآن سے جتنا انس اور اس میں تدبر بڑھتا جائے گا اسلامی معاشرے میں برکتیں اور کامیابیاں بھی روز بروز بڑھتی جائیں گی ۔
قائد انقلاب اسلامی نے گذشتہ برسوں میں ایران کے اسلامی نظام کی کامیابیوں اور زورزبردستی کرنے والی طاقتوں کے مقابلے میں ملت ایران کی استقامت کی طرف اشارہ کرتے ہوئے فرمایا کہ یہ ساری کامیابیاں خاص طور سے مختلف علمی وسائنسی میدانوں میں ایرانی جوانوں کی کامیابیاں اسی طرح ایران میں عدل و انصاف کے نفاذ کی علامتیں ایرانی عوام اور حکام کے قرآن سے مانوس ہونے کی برکتیں ہیں ۔
قائد انقلاب اسلامی حضرت آیت اللہ العظمیٰ خامنہ ای نے ایران میں اس وقت قرآنی موقف کو ایک اسلامی معاشرے کی شروعات قراردیا اور فرمایا کہ قرآن کی معرفت نےاسلامی نظام کو مثالی بنادیا ہےاور مسلمان قوموں کی بیداری کا موجب بنی ہے ۔
قائد انقلاب اسلامی نے دنیا میں مسلمانوں کی سربلندی اور انسانی حقوق و جمہوریت کے دعویداروں کی پے در پے ناکامی و رسوائی کی طرف اشارہ کرتے ہوئے فرمایا کہ مسلمانوں کا یقین اور احساس عزت و سربلندی کرنا قرآنی وعدہ ہے کہ حزب اللہ لبنان کو ایک بڑی فوج کے مقابل جسے ہمہ گیر حمایت حاصل تھی کامیابی عطا کی ہے ۔(27 ستمبر 2006)